१४ भदौ, काठमाडौं । नेपाल एलपी ग्यास उद्योग संघले विनाशकारी बाढीबाट प्रभावित नागरिकहरूको राहतका लागि १ हजार २ सय ५० थान भरिएका ग्यास सिलिन्डर उपलब्ध गराउने भएको छ । संघका अध्यक्ष दिवानबहादुर चन्दले यस सहयोगको प्रतिबद्धता जनाएका हुन् ।

विपद् कसैको एक्लो समस्या नभई सबैको साझा जिम्मेवारी रहेको बताउँदै उनले प्रभावितहरूको तत्कालको आवश्यकता र कठिनाइलाई मध्यनजर गर्दै संघले सहयोगको हात बढाएको जनाए । संघले उपलब्ध गराउने सिलिन्डर नेपाल आयल निगममार्फत लक्षित वर्गसम्म पुर्‍याइने छ ।

गत १० भदौ बिहान भोटेकोशी नदीमा आएको विनाशकारी बाढीका कारण रसुवा, नुवाकोट, धादिङ र गोरखा लगायतका जिल्लामा ठूलो जनधनको क्षति भएको थियो, जसप्रति संघले दुःख व्यक्त गरेको छ ।