रसुवागढी–टिमुरेमा सीसीटिभी र सिस्मोमिटर जडान सुरु

Nepal NB News

१५ भदौ २०८३, सोमवार

काठमाडौं । रसुवाको रसुवागढी र टिमुरे क्षेत्रमा सीसीटिभी क्यामेरा र सिस्मोमिटर जडानको काम सुरु भएको छ ।

समस्या के भयो ?
भोटेकोशी बाढीले पूर्व सूचना दिने स्वचालित प्रणाली र अन्य सञ्चार उपकरण बगाएपछि त्यस क्षेत्रको प्राकृतिक प्रकोप पूर्वसूचना प्रणाली अवरुद्ध भएको थियो । यसअघि खोला किनार तथा पुलहरूमा जडान गरिएका पूर्वसूचना उपकरण र सेन्सरहरू पनि रसुवादेखि धादिङको मलेखुसम्मका पुल बाढीमा बग्दा सबै ६ वटै बगेका छन् । यसले गर्दा हाल शाखाले उद्दारमा खटिएका प्रहरी र सेनालाई फोन गरेरै जानकारी लिइरहेको छ ।

अहिले भइरहेको काम
बाढी पूर्वानुमान शाखाका प्रमुख विनोद पराजुलीका अनुसार, जोखिमयुक्त क्षेत्रमा वास्तविक समयको निगरानी (real-time monitoring), बाढी जोखिम पहिचान र पूर्वसूचना प्रणालीलाई सुदृढ गर्ने काम सुरु भएको हो ।

सोमबार बिहान त्रिभुवन विमानस्थलबाट हेलिकप्टरमार्फत टोली त्यहाँ पुगेको थियो ।
समाचार तयार पार्दासम्म सोलार पावर जडान सकिइसकेको छ ।
सीसीटिभीको भिडिओ काठमाडौंबाट हेर्न इन्टरनेट आवश्यक भएकाले शाखाको टोलीसँगै मर्कन्टाइल कम्युनिकेसनको टोली पनि साथै पुगेको छ ।

अबको योजना
पराजुलीका अनुसार पहिला स्याटलाइटमा आधारित इन्टरनेट जडान हुनेछ, त्यसपछि मात्रै सीसीटिभी जडान गरिनेछ । सीसीटिभी खोलातर्फ फर्काइनेछ, जसलाई काठमाडौंबाटै निरन्तर निगरानी गरी बाढी आए/नआएको जानकारी लिइनेछ ।

तत्कालै पूर्ण सेन्सर÷उपकरण जडान सम्भव नभएकाले काम चलाउ (temporary) उपायको रूपमा सीसीटिभीमार्फत प्रारम्भिक जानकारी लिने योजना छ । साथै रसुवागढीमा भूकम्प मापन गर्ने सिस्मोमिटर पनि जडान गरिँदैछ ।

प्रकाशित : १५ भदौ २०८३, सोमवार 12:41