इटालीमा विद्यालयभित्र बुर्का र नकाबमा प्रतिबन्ध लगाउने तयारी: आप्रवासी नीतिमा थप कडाइ

Nepal NB News

५ असोज २०८३, सोमवार

इटाली सरकारले देशका विद्यालयहरूमा ठूलो नीतिगत परिवर्तन गर्ने तयारी गरेको छ। इटालेली प्रधानमन्त्री जर्जिया मेलोनीले कक्षाकोठामा विदेशी विद्यार्थीहरूको संख्या सीमित गर्ने र विद्यालय परिसरमा बुर्का तथा नकाबको प्रयोगमा प्रतिबन्ध लगाउने नयाँ विधेयक ल्याउने घोषणा गर्नुभएको छ।

रोममा आयोजित 'जियोभेन्टु नाजिओनाले' (Gioventù Nazionale) युवा महोत्सवमा बोल्दै प्रधानमन्त्री मेलोनीले इटालीमा बस्न चाहनेहरूले स्थानीय संस्कृति र नियमलाई अनिवार्य रूपमा पालना गर्नुपर्ने बताउनुभयो।

मुख्य बुँदाहरू:

बुर्का र नकाब प्रतिबन्ध: विद्यालयहरूमा सम्पूर्ण शरीर ढाक्ने बुर्का र अनुहार मात्र देखिने नकाब लगाउन पाइने छैन। यद्यपि, सामान्य हिजाब (शिरोवस्त्र) को विषयमा भने कुनै प्रतिबन्ध लगाइएको छैन।
कक्षाकोठामा संख्या सीमित: विद्यालयका कक्षाकोठामा विदेशी विद्यार्थीहरूको अधिकतम संख्या तोकिनेछ।
अभिभावकका लागि भाषा कक्षा अनिवार्य: विद्यालय प्रणालीमा घुलमिल हुन कठिन मान्ने विदेशी विद्यार्थीका अभिभावकहरूका लागि इटालियन भाषाको कक्षा अनिवार्य गरिनेछ।
सांस्कृतिक एकीकरणमा जोड: मेलोनीले इटालीमा भविष्य बनाउन चाहने जोसुकैले पनि यहाँको भाषा सिक्नुपर्ने र कानुनको सम्मान गर्नुपर्ने तर्क गर्नुभएको छ।