११ भदौ, काठमाडौं । टप एन्ड टी–२० सिरिजमा नेपाल किङ्समेनसँग पराजित भएको छ । बिहीबार भएको खेलमा नेपाल ३१ रनले पराजित भएसँगै टोलीको सेमिफाइनल पुग्ने सम्भावना पनि समाप्त भएको छ ।

किङ्समेनले दिएको १९८ रनको लक्ष्य पछ्याउने क्रममा नेपालले १९.२ ओभरमा सबै विकेट गुमाएर १६६ रन मात्रै बनाउन सक्यो । नेपालका लागि कुशल भुर्तेलले सर्वाधिक ६६ रनको योगदान दिए । तर, उनको प्रदर्शन टोलीलाई जित दिलाउन पर्याप्त भएन ।

नेपालको ब्याटिङमा लोकेश बम र अनिल साहले समान ११ रन जोडे भने बिपिन खत्रीले १० रन बनाए ।

किङ्समेनको बलिङतर्फ स्कट कुगेलेइन र उसामा मिरले ३–३ विकेट लिए । अली शेखले २ तथा उमेर खान र हमाद आजमले समान १ विकेट लिए ।

यसअघि टस हारेर ब्याटिङको जिम्मेवारी पाएको किङ्समेनले निर्धारित २० ओभरमा ५ विकेटको क्षतिमा १९७ रनको योगफल तयार गरेको थियो ।

किङ्समेनका शेहान जयसूर्याले ६७ रनको उत्कृष्ट इनिङ्स खेले । शयान जहाङ्गिरले २७, हम्माद आजमले २६, मिलिन्द कुमारले २५ तथा तयाब आरिफले २२ रन बनाए ।

नेपालका लागि नारायण जोशीले २ विकेट लिए । राशिद खान, पवन सर्राफ र कुशल भुर्तेलको नाममा समान १ विकेट रह्यो ।

यो हारसँगै नेपालले प्रतियोगितामा खेलेका पाँचमध्ये तीन खेलमा हार र दुई खेलमा जित निकालेको छ । अब नेपालसँग प्रतियोगिताको अन्तिम खेल मात्र बाँकी छ ।

अन्तिम खेलमा नेपालले जित हात पारे पनि टोलीको अधिकतम ६ अंक मात्रै हुनेछ । शीर्ष चार टोलीको अंक ८ पुग्ने समीकरण बनेपछि नेपाल सेमिफाइनलको दौडबाट बाहिरिएको हो ।