एसीसी मेन्स प्रिमियर कप: ओमनलाई पराजित गर्दै नेपाल फाइनलमा, उपाधिका लागि UAE सँग भिड्ने

Nepal NB News

२५ भदौ २०८३, बिहिवार

काठमाडौँ। एसीसी मेन्स प्रिमियर कपको पहिलो सेमिफाइनल खेलमा नेपालले ओमनलाई ८७ रनको फराकिलो अन्तरले पराजित गर्दै फाइनलमा आफ्नो स्थान सुरक्षित गरेको छ। यस जितसँगै नेपालले आगामी शनिबार हुने उपाधि भिडन्त (फाइनल) मा संयुक्त अरब इमिरेट्स (UAE) को सामना गर्नेछ।

नेपालले दिएको १४८ रनको लक्ष्य पछ्याएको ओमनलाई नेपाली बलरहरूले २८.१ ओभरमा मात्र ६० रनमा समेटिदिएका थिए। नेपालका लागि दीपेन्द्र सिंह ऐरी र सन्दीप लामिछानेले ३–३ विकेट तथा कप्तान रोहित पौडेलले २ विकेट लिएका थिए।

यसअघि टस हारेर पहिले ब्याटिङ गरेको नेपालले ४५.४ ओभरमा सबै विकेट गुमाएर १४७ रन बनाएको थियो। नेपालका लागि दीपेन्द्र सिंह ऐरीले सर्वाधिक ५१ रन र बसिर अहमादले ४७ रनको योगदान दिएका थिए। अलराउन्ड प्रदर्शन गर्दै ५१ रन बनाउनुका साथै ३ विकेट समेत लिएका दीपेन्द्र सिंह ऐरी खेलको 'प्लेयर अफ द म्याच' घोषित भए।

अब नेपालले प्रिमियर कपको उपाधिका लागि शनिबार UAE सँग प्रतिस्पर्धा गर्नेछ।

प्रकाशित : २५ भदौ २०८३, बिहिवार 13:31